இன்று மாலை கைது செய்யப்பட்ட சரத் பொன்சேகா இராணுவ நீதிமன்றில் விசாரணைக்கு உட்படுத்தப்படவுள்ளார். இராணுவ இரகசியங்களை வெளியிட்டமை மற்றும் ஜனாதிபதி மஹிந்த இராஜபக்‌ஷவை கொலை செய்ய திட்டமிட்டமை போன்றவற்றுக்காகவே விசாரணை செய்யப்படவுள்ளார். இவ்வாறு ஊடக அமைச்சர் லக்ஸ்மன் ஹலுகல்ல தெரிவித்துள்ளார்.

வெளி நாடு ஒன்றில் இருந்து கைது செய்யப்பட்டு இலங்கை கொண்டுவரப்பட்ட விடுதலைப்புலி உறுப்பினர் ஒருவரையும், விமான எதிர்ப்பு ஏவுகணையால் எம்.ஐ உலங்கு வானூர்தியினை சுட்டு வீழ்த்திய புலி ஒருவரையும் விசாரணை செய்ய நீதிமன்றம் அனுமதி அளித்துள்ளதாம்.

எதிர்வரும் பொதுத்தேர்தலில் ஆளும் கட்சியுடனோ அல்லது எதிர்க் கட்சியுடனோ இணைந்து போட்டியிடும் எண்ணம் தனக்கு இல்லை என நாடாளுமன்ற உறுப்பினர் சிவாஜிலிங்கம் தெரிவித்துள்ளார்.

இலங்கை தொலைதொடர்பு திணைக்களம் இணைய தளங்களை மிக உன்னிப்பாக கண்காணிக்கும் திட்டத்தினை நடைமுறைப்படுத்துவதுடன் குறிப்பாக Face book, Twitter போன்ற சமூக தொடர்பு தளங்களை விசேடமாக கண்காணிக்க உள்ளதாக அறிவித்துள்ளது.

தேர்தல் முடிவுகள் மஹிந்தவுக்கு சாதகமாக வந்தால் மஹிந்த இராசபக்‌ஷவை கொலை செய்வதற்கும், கலகங்கள் செய்வதற்கும் சரத் பொன்சேகா திட்டமிட்டு இருந்ததாக இது தொடர்பாக விசாரணை நடாத்தி வரும் பொலிசார் கூறியுள்ளனர்.

இலங்கை தமிழ் அகதிகள் 40 பேர் கப்பல் ஒன்றில் கிறிஸ்மஸ் தீவை வந்தடைந்ததாக அவுஸ்ரேலிய அகதிகள் சபை தெரிவித்துள்ளது. கடந்த ஜனவரி 10 ஆம் திகதி இலங்கையில் இருந்து புறப்பட்ட இவர்கள் நேற்று கிறிஸ்மஸ் தீவுக்கு வந்தடைந்ததாகவும் கூறப்படுகின்றது.

தமிழ் தேசிய கூட்டமைப்பின் தலைவர் இரா சம்பந்தன் இலண்டன் வந்துள்ளார். நேற்று முந்தினம் வந்துள்ள சம்பந்தன் அவர்கள் தனது சகோதரரின் மரணக்கிரிகைகளில் கலந்து கொள்வதுடன் தனது கொள்கைகளுக்கு ஆதரவான புலம் பெயர் மக்களில் சிலரையும் சந்திப்பார் என இலண்டன் செய்திகள்  தெரிவிக்கின்றன.

தமிழ்ச் சமூகம் என்பது தனித்துவம்மிக்கதொரு இனமாகும். வடக்கு, கிழக்கு என்பது தமிழரின் பூர்வீகத் தாயகம் என்ற உண்மையை உணர்த்தியுள்ள தமிழ் மக்கள் தமக்கு ஏற்றதான அரசியல் தீர்வு வழங்கப்பட வேண்டும் என்பதையும் தேர்தல் முடிவுகளில் வலியுறுத்தியுள்ளனர்.

உலகத்தமிழர்கள் தம்மை எவரும் தொடுவதற்கு அனுமதிக்க முடியாதவாறு ஒன்றுபட்டு நிற்க வேண்டும். சிங்கப்பூரைச் சேர்ந்த சிவகாமிதேவி மேற்கண்டவாறு தெரிவித்தார்.

வட பகுதியில் கண்ணிவெடிகளை அகற்றி இடம்பெயர்ந்த மக்களை மீளக்குடியேற்ற அவசர காலச் சட்டம் தேவையெனில் ஏன் நாடு முழுவதும் அச்சட்டத்தை அமுல்படுத்த வேண்டும்? வடபகுதியில் மட்டும் அதை அமுல்படுத்தலாமே?" என ஐ.தே.கட்சி எம்.பி.லக்ஷ்மன் செனவிரத்ன கேள்வி எழுப்பினார்.